Gəncənin "Sovxoz Nizami" adlanan dairəsi yaxınlığında Üzeyr Hacıbəyov və Zülfi Hacıyev küçələrinin kəsişməsində piyadaların təhlükəsizliyi ilə bağlı problem yaşanır.
Gencexeber.az-a vətəndaşlar tərəfindən ünvanlanan müraciətlərdə bildirilir ki, ərazidə yol təmir edilsə də, hələlik xətlənmə işləri aparılmayıb. Əsas narahatlıq doğuran məsələ isə asfalt örtüyünün üzərində piyada keçidini bildirən xətlərin çəkilməməsidir.
Sözügedən ərazi gediş-gəlişin intensiv olduğu geniş yoldur və eyni zamanda Samux avtobuslarının son dayanacağı burada yerləşir. Bu səbəbdən gün ərzində yolu keçən piyadaların sayı kifayət qədər çoxdur.
Vətəndaşların sözlərinə görə, xüsusilə uşaqlar üçün vəziyyət daha təhlükəlidir. Qarşıdan yeni dərs ilinin və məktəblərin fəaliyyətə başlaması fonunda problemin daha da aktuallaşacağı bildirilir.
Sakinlər aidiyyəti qurumlardan ərazidə xətlənmə işlərinin aparılaraq piyadaların təhlükəsizliyinin təmin olunmasını xahiş edirlər.
