Gəncə sakinləri fırıldaqçıların qurbanları olublar. Bu haqda 9 mart tarixində Baku TV-yə istinadən məlumat veririk.
Bir müddət əvvəl “İnstpower” adlı xarici şirkətlərdən biri şəhərdə Həsən Əliyev küçəsi, 104 ünvanında ofis açaraq fəaliyyətə başlayıb. Sakinlərin sözlərinə görə, özünü poverbank şirkəti adı ilə tanıdan bu qurum onların pullarını mənimsəyib.
Belə ki, son zamanlar bir çox insanların qoşulduğu və “piramida” olduğunu bilmədiyi adıçəkilən şirkət vətəndaşları aldadıb. Şəhərimizin sakinləri də bu fırıldaqçılığın qurbanlarından olublar.
Zərərçəkmişlərin sözlərinə görə, şirkət onlara yatırdıqları pulların poverbank istehsalı və "paylaşılması" biznesinə yönəltdiyini bildirib. Buradan əldə etdiyi gəlirin isə 20 faizini özünə saxlayaraq qalan hissəsini yatırım etmiş vətəndaşlara ödəyir.
Bu vədlərlə bir çox insanları cəlb edən şirkət “partlayıb” və piramidanın adminləri sistemi söndürərək yoxa çıxıblar. "İnstpower"in adminləri məlumat yayıblar ki, sistem bağlanmayıb, sadəcə "investorların" hesablarına pulun köçürülməsində problem yaranıb. Bildirilib ki, serverlər yeniləndiyindən və vergi problemlərinə görə "İnstpower" işləmir.
Aldandıqlarını indi başa düşən vətəndaşlar hələ də "problemin" həll ediləcəyinə ümid edirlər. Artıq bir sıra zərərçəkmişlər bununla bağlı polisə müraciət ediblər.
Qeyd edək ki, “İnstpower” şirkəti 2019-cu ildən fəaliyyət göstərir. Baş ofis Honq-Konqda yerləşir və rəsmi olaraq dünyanın 20-dən çox ölkəsində 20.000-dən çox ofisləri var.
