Gəncə şəhər ərazisində fəaliyyət göstərən bəzi məktəbəqədər təhsil müəssisələrində müəyyən olunmuş iş saatlarına əməl olunmamasının valideynlərin narazılığına səbəb olduğu iddia edilir.
Gencexeber.az-a daxil olan şikayətlərə görə, bəzi bağçalarda valideynlərdən uşaqlarını rəsmi iş vaxtı başa çatmamış götürmələri tələb edildiyi deyilir. Bildirilir ki, müəssisələrin müəyyən olunmuş iş qrafiki olsa da, bəzi hallarda valideynlərə saat 16:00-dan etibarən zəng olunaraq uşaqlarını bağçadan götürmələri istənilir.
Bu vəziyyət xüsusilə iş vaxtı saat 18:00-a qədər davam edən valideynlər üçün çətinlik yaradır. Şikayətçilərin sözlərinə görə, digər uşaqların bağçanı daha tez tərk etməsi nəticəsində müəssisədə qalan uşaqlar da özlərini narahat hiss edirlər.
Valideynlər iddia edirlər ki, günün sonunda bağçada az sayda uşağın qalması onlarda psixoloji narahatlıq yaradır. Uşaqlar digər həmyaşıdlarının evə getdiyini gördükdə, valideynlərinin gəlməyəcəklərini düşünərək təşviş keçirirlər.
Bundan əlavə, hər ailənin şəraitinin eyni olmadığı vurğulanır. Tək valideynlə yaşayan, iş yerindən tez ayrıla bilməyən və ya uşağını bağçadan götürmək üçün başqa imkanı olmayan şəxslər üçün bu cür hallar əlavə çətinlik yaradır.
Vətəndaşların əsas tələbi odur ki, ciddi zərurət olmadığı halda uşaqlar bağçaların müəyyən edilmiş rəsmi iş saatı başa çatanadək müəssisədə qala bilsinlər. Onlar valideynlərə uşaqlarını vaxtından əvvəl götürmələri üçün təzyiq göstərilməməsini istəyirlər.
Məsələ ilə bağlı redaksiyamız tərəfindən Gəncə-Daşkəsən Regional Təhsil İdarəsinə sorğu ünvanlanıb.
