Gəncədə istehsal olunan sənaye məhsullarının dəyəri açıqlanıb. Bu haqda 14 avqust tarixində Fed.az-a istinadən məlumat veririk.
Gəncə şəhər Statistika idarəsi sənayenin vəziyyəti haqda göstəriciləri paylaşıb. Yanvar-iyun aylarında şəhərdəki sənaye müəssisələri və fiziki şəxslər tərəfindən faktiki qiymətlərlə 300,1 milyon manatlıq sənaye məhsulu istehsal edilib və sənaye xarakterli xidmətlər göstərilib. Məhsulun və xidmətlərin 78,2 milyon manatı (26,1 faiz) dövlət, 221,9 milyon manatı (73,9 faiz) isə qeyri-dövlət sektorunun sənaye müəssisələri və fərdi sahibkar olan fiziki şəxslər tərəfindən istehsal edilib.
Emal sektorunun müəssisələri tərəfindən 221 milyon manatı (82,8 faizi) qeyri-dövlət sektoruna aid olmaqla 266,9 milyon manatlıq məhsul istehsal olunub və sənaye xarakterli xidmətlər göstərilib. Ondan 70 milyon manat qida məhsulları istehsalı, 6,1 milyon manat içki, 126,6 milyon manat metallurgiya sənayesi məhsulları, 45,9 milyon manat avtomobil, qoşqu və yarımqoşquların istehsalı və 18,3 milyon manat digər məhsulların istehsalı təşkil edib.
Bu ilin ilk yarısı (yanvar-iyun ayları) ərzində 43,5 min ton un, 23,6 ton makaron, 69,4 min dekalitr araq, 61,5 min dekalitr şərab, 364 ədəd traktor, 164 ədəd MAZ yük avtomobili, 11681,3 ton emal edilməmiş alüminium ərintiləri (ilkin şəkildə), 50 ədəd taxılyığan kombayn, 4103 ədəd elektron, 94927 ədəd mexaniki su sayğacları istehsal olunub.
Elektrik enerjisi, qaz və buxar istehsalı, bölüşdürülməsi və təchizatı sektorunun müəssisələri tərəfindən sözügedən dövr ərzində 21,2 milyon, su təchizatı, tullantıların təmizlənməsi və emalı sektorunda 11,6 milyon manatlıq məhsul istehsal edilib və xidmətlər göstərilib.
