Gəncədə adam oğurluğunda təqsirləndirilən Yusif Əliyevə (şərti) hökm oxunub. Bu haqda 17 iyun tarixində Qafqazinfo-ya istinadən məlumat veririk.
Proses Gəncə Ağır Cinayətlər Məhkəməsində aparılıb. 32 yaşlı Y.Əliyevə Cinayət Məcəlləsinin 144.3-cü maddəsi ilə 4 il 6 ay həbs cəzası verilib.
Hadisə ötən il martın 8-də, axşam radələrində qeydə alınıb. Sərxoş vəziyyətdə olan təqsirləndirilən şəxs qohumu Gülnar Qasımovanı (şərti) yaşadığı ünvandakı evindən çıxararaq şəxsi avtomobilinə mindirib. Bu vaxt avtomobildə Y.Əliyevin həmkəndlisi də olub.
Yolda isə qıza onu evlənmək məqsədilə qaçırdığını bildirib. Bunu eşidəndən sonra Gülnar ondan avtomobili dayandırmasını təkid etsə də, Y.Əliyev yoluna davam edib.
Gülnar qohumunun dayanmayacağını görüb, Göygöl rayonundakı kəndlərdən birinin ərazisində özünü avtomobildən yerə atıb. Nəticədə o, qapalı kəllə-beyin travması alaraq, huşunu itirib. Y.Əliyev onu xəstəxanaya çatdırandan sonra ərazidən uzaqlaşıb.
