Gəncədə baş verən oğurluq hadisəsinin təfərrüatları məlum olub. Bu haqda 3 mart tarixində Daxili İşlər Nazirliyinə istinadən məlumat veririk.
Bu gün “Megastore” mağazasında baş verən oğurluq hadisəsi barədə məlumat vermişdik. DİN-dən oğurluğun təfərrüatları açıqlanıb. Belə ki, “Megastore” marketinə girən şəxs mühafizəçi M.Həsənovun baş nahiyəsinə küt alətlə xəsarət yetirib, əl və ayaqlarını yapışqanlı lentlə bağlayıb. Daha sonra oradan içərisində 157.151 manat, 6.040 ABŞ dolları və 18.100 rubl olan seyfi aparıb.
Baş Polis İdarəsinin əməkdaşları tərəfindən müvafiq tədbirlər həyata keçirilib və həmin seyf mağazaya yaxın ərazidə toxunulmamış və torpağa basdırılmış vəziyyətdə tapılıb. Hadisəni törədən və ya törədənlərin tutulması üçün əməliyyat-axtarış tədbirləri aparılır.
