Gəncədə Ümumdünya Qan Donoru Günü münasibətilə tədbir keçirilib. Bu haqda 14 iyun tarixində İcra Hakimiyyətinə istinadən məlumat veririk.
İcra başçısı Niyazi Bayramov Milli Hematologiya və Transfuziologiya Mərkəzi Qan Bankının Gəncə Bölməsinin baş həkimi Vüsalə Əhmədova ilə görüşüb. Bildirilib ki, hər il dünyada 14 İyun – Ümumdünya Qan Donoru Günü kimi qeyd olunur. Bu günün qeyd olunmasının ictimaiyyətin diqqətini insanlığın təhlükəsiz qan və qan komponentlərinə olan tələbatına cəlb etmək, bu sahədə əhalini məlumatlandırmaq və başqalarının həyatını xilas etmək naminə təmənnasız olaraq öz qanını verən xeyirxah və mərhəmətli qan donorlarına hörmət və ehtiram göstərmək məqsədi daşıdığı vurğulanıb.
Sonra Vüsalə Əhmədova qan donorluğunda fəal iştirakına və qana ehtiyacı olan insanların həyatının xilas olunmasına yardımçı olmasına görə icra başçısı Niyazi Bayramova “Təşəkkürnamə” təqdim edib. Eyni zamanda şəhər rəhbərliyi Səhiyyə Nazirliyi, Milli Hematologiya və Transfuziologiya Mərkəzi tərəfindən "Fəxri donor" elan olunub.
Niyazi Bayramov göstərilən diqqət üçün minnətdarlığını bildirib. Sonda xatirə şəkli çəkdirilib.
