Gəncədə yüksək bal toplayan məzunlarla görüş keçirilib. Bu haqda 12 sentyabr tarixində İcra Hakimiyyətinə istinadən məlumat veririk.
Tədbirə icra başçısı Niyazi Bayramov, millət vəkili Pərvin Kərimzadə, Gəncə-Daşkəsən Regional Təhsil İdarəsinin müdiri Anar Qədiməliyev, DİM Gəncə Regional Bölməsinin müdiri Nəsimi Məmmədov, İcra Hakimiyyəti başçısı Aparatının məsul əməkdaşları və məzunların təhsil aldıqları ümumtəhsil məktəblərin direktorları qatılıblar. Şəhər rəhbəri yüksək bal toplamış məzunları, onların valideynlərini və təhsil ictimaiyyətini təbrik edib.
Anar Qədiməliyev çıxışında bildirib ki, 2022-2023-cü tədris ilində Gəncə şəhər ümumtəhsil məktəblərini 2961 şagird bitirib. Onların 1497 nəfəri respublikanın, 133-ü isə xarici ölkələrin ali məktəblərinə qəbul olunub. Həmin məzunların 181 nəfəri 500-dən, 54 nəfəri 600-dən və görüşdə iştirak edən 8 nəfəri isə 650-dən yüksək bal toplayıblar.
Tədbirdə iştirak edən rəsmilər yeniyetmələri təbrik edərək, onlara öz tövsiyələrini verib və bundan sonrakı həyatlarında uğurlar arzulayıblar.
Daha sonra məzunlara hədiyyələr təqdim olunub. Niyazi Bayramov Gəncə şəhərində təhsilin inkişafına göstərdikləri xidmətlərə görə yüksək bal toplamış məzunların təhsil aldıqları orta məktəb direktorlarını "Təşəkkürnamə" ilə təltif edib.
Sonda xatirə şəkli çəkdirilib.
