Gəncə Apellyasiya Məhkəməsində yol qəzası törətməkdə təqsirləndirilən Qalib Məmmədlinin (ad, soyadı şərtidir) barəsindəki hökmdən verilən apellyasiya şikayəti üzrə məhkəmə iclası başa çatıb.
Pravda.аz xəbər verir ki, hakim Salman Hüseynovun sədrliyi ilə keçirilən prosesdə qərar elan olunub.
Qərara əsasən, apellyasiya şikayəti qismən təmin edilib, Gəncə Ağır Cinayətlər Məhkəməsinin 26 noyabr 2024-cü il tarixli hökmü apellyasiya şikayətinə münasibətdə əsas cəzaya aid hissəsində dəyişdirilib. Belə ki, təqsirləndirilən şəxs təqsirli bilindiyi Cinayət Məcəlləsinin 263-1.3-cü maddəsi ilə təyin edilmiş 6 il müddətə azadlıqdan məhrumetmə cəzasının həddi azaldılaraq 5 il müddətə endirilib. Qalib Məmmədli azadlıqdan məhrum etmə cəzasını məntəqə tipli cəzaçəkmə müəssisəsində çəkəcək.
İttihama görə, hadisə 1 yanvar 2024-cü il tarixdə, saat 19 radələrində Mingəçevir-Bəhrəmtəpə yolunun rayonun Əyricə kəndi ərazisindən keçən hissəsində qeydə alınıb.
Belə ki, Qalib Məmmədlinin idarə etdiyi “Ford Fusion” markalı minik avtomobili ilə “VAZ 2107” markalı maşın toqquşub. Nəticədə “Jiquli”nin sürücüsü Eldəniz Məmmədov ölüb, iki nəfər isə xəsarət alıb.
Hadisədən sonra Qalib Məmmədli saxlanılaraq cinayət məsuliyyətinə cəlb edilib.
Qeyd edək ki, Qalib Məmmədli Vətən müharibəsində iştirak edib, göstərdiyi şücaətə görə medallarla təltif olunub.
