Gəncədə 18 il həbs cəzası verilən məhkumun işinə yenidən baxılacaq. Bu haqda 23 avqust tarixində Qafqazinfo-ya istinadən məlumat veririk.
Tovuzun Dondar Quşçu kəndində 10 yaşlı Nərmin Quliyevanı öldürməkdə təqsirli bilinərək azadlıqdan məhrum edilmiş İlkin Süleymanovun cinayət işi Gəncə Ağır Cinayətlər Məhkəməsinə qaytarılıb. Bu barədə Gəncə Apellyasiya Məhkəməsi qərar qəbul edib.
Səbəb Nərminin atası Şərif Quliyevin hökmdən apellyasiya şikayəti verməsidir. Zərərçəkmiş tərəf Süleymanovun ömürlük məhkum edilməsini tələb edir. Prosessual müddət başa çatdığı üçün apellyasiya şikayəti verilməsinin mümkünlüyü məsələsinə birinci instansiya məhkəməsində baxılmalıdır.
Yekun qərar verilənə kimi proses təxirə salınıb.
Müdafiə tərəfi isə Şərif Quliyevin şikayətini əsassız hesab edir. İlkin Süleymanovun vəkili Zabil Qəhrəmanov əvvəlki iclasda məhkəmənin istintaqla aparılması, əlavə şahidlərin dindirilməsi və sair vəsatətlər qaldırıb. Məhkəmə vəsatətlərin heç birini təmin etməyib.
Xatırladaq ki, cinayət hadisəsi 2020-ci ildə baş verib. İlkin Süleymanov həmkəndlisi olan 10 yaşlı Nərmin Quliyevanı oğurlayıb xüsusi amansızlıqla öldürməkdə, cəsədini yandırmaqda ittiham olunur. O, 18 il müddətinə azadlıqdan məhrum edilib.
