Şəmkir rayonunun Mahmudlu kəndində Yaşar Əsgərov adına tam orta məktəb təmir edilir.
Gencexeber.az-ın məlumatına görə, təxminən üç aydır davam edən işlər yekunlaşmaq üzrədir. Təhsil ocağının sentyabrın 15-nə şagirdlərin istifadəsinə verilməsi planlaşdırılır.
Binada istilik sistemi və xətlər tamamilə yenilənib, yeni qazanxananın tikilməsi də nəzərdə tutulub. Layihə üzrə 480 yerlik məktəbdə yeni tədris ilində 638 şagirdin təhsil alacağı gözlənilir.
Bununla yanaşı Gəncədəki məktəblərdən birinin vəziyyəti narahatlıq doğurur. Belə ki, Nikolay Nekrasov adına 19 nömrəli tam orta məktəbin əsaslı təmirə bağlanmasından iki ildən artıq vaxt keçməsinə baxmayaraq, burada söküntü işlərinə belə başlanılmayıb.
Məktəbin şagirdləri əvvəlcə 34 nömrəli məktəbdə, ötən ildən isə əsaslı təmirdən çıxan 24 nömrəli məktəbdə təhsil alırlar.
