Gəncədə kafeyə qumbara atan şəxs Bakıda zərərsizləşdirilib. Bu haqda 22 may tarixində APA.az-a istinadən xəbər veririk.
Naməlum şəxs Gəncə şəhəri ərazisindəki kafelərdən birinə qumbara ataraq, bir neçə nəfərin xəsarət alması və kafeyə ciddi maddi ziyan dəyməsi ilə nəticələnən cinayət hadisəsi törədib.
Daxili İşlər Nazirliyi Mətbuat Xidmətindən verilən məlumata görə, polis əməkdaşları tərəfindən keçirilmiş əməliyyat-axtarış tədbirləri nəticəsində həmin şəxsin törətdiyi müxtəlif cinayətlərə görə əvvəllər dəfələrlə məhkum olunmuş Gəncə şəhər sakini Elmir Nağıyev olması və onun Bakı şəhərindəki mənzillərdən birində gizləndiyi müəyyən olunub. E.Nağıyev saxlanılarkən polis əməkdaşlarına qarşı odlu silahla müqavimət göstərib. Bundan sonra polis əməkdaşları tərəfindən silah tətbiq edilib, nəticədə Elmir Nağıyev zərərsizləşdirilib.
Hadisə yerindən 1 ədəd əl qumbarası və tapança götürülüb. Hazırda əməliyyat-istintaq tədbirləri davam etdirilir.
