Gəncədə “Kəpəz”ə dəstək üçün görüş təşkil olunub. Bu haqda 10 mart tarixində futbol klubuna istinadən məlumat veririk.
“Kəpəz”ə dəstək” adı altında tədbir Futbolun İnkişaf Fondu, Gəncə şəhər İcra Hakimiyyəti və “Kəpəz” Peşəkar Futbol Klubunun birgə təşkilatçılığı və dəstəyi ilə Gəncə Dövlət Filarmoniyasında baş tutub. Bura İcra Hakimiyyətinin rəhbərliyi, millət vəkilləri, dövlət qurumlarının əməkdaşları, iş adamları və ictimaiyyət nümayəndələri qatılıblar.
FİF-nin icraçı direktoru Tural Piriyev və “Kəpəz” klubunun idarə heyətinin sədri İlqar Nadiri təqdimatlarla çıxış ediblər. Tural Piriyev fondun fəaliyyəti çərçivəsində "Kəpəz"lə bağlı icra olunan ianə kampaniyaları, İlqar Nadiri isə klubda həyata keçirilən layihələrlə bağlı məlumat verib.
