Gəncədə uşaqlar arasında minifutbol üzrə region birinciliyi keçirilib. Bu haqda 5 iyun tarixində Kəpəz TV-yə istinadən məlumat veririk.
Şəhidlərin xatirəsinə həsr olunan yarış Gəncə Futbol Veteranları Birliyi və AFFA-nın təşkilatçılığı ilə baş tutub.
Açılış mərasimində rəsmilər, veteran futbolçular, müharibə veteranları və şəhidlərin ailə üzvləri iştirak ediblər. Yarışda 2014-2015-ci il təvəllüdlülərdən ibarət 4 komanda mübarizə aparıb.
Gəncənin “Kəpəz” və “Lokomotiv”, eləcə də “Turan Tovuz” və Mingəçevirin “Uğur” kollektivləri qələbə uğrunda mübarizə aparıblar. Nəticələrə əsasən, “Lokomotiv” birinciliyin qalibi olub. “Kəpəz” ikinci, “Uğur” isə 3-cü yerə layiq görülüb.
Sonda fəxri yer tutan komandaların üzvlərinə diplom və hədiyyələr təqdim olunub.
