Gəncədə İranda şəhid olan Orxan Əsgərovun 40 mərasimi keçirilib. Bu haqda 9 mart tarixində İcra Hakimiyyətinə istinadən məlumat veririk.
Mərasimdə icra başçısı Niyazi Bayramov, Türkiyənin Gəncədəki Baş konsulu Recep Öztop, AMEA Gəncə Bölməsinin sədri, akademik Fuad Əliyev, millət vəkilləri Naqif Həmzəyev, Müşfiq Cəfərov, İcra Hakimiyyəti başçısı Aparatının məsul əməkdaşları, bələdiyyə sədrləri, idarə, müəssisə və təşkilat rəhbərləri iştirak ediblər. Şəhər rəhbəri şəhid Orxan Əsgərovun atası Rizvan Əsgərova başsağlığı verib.
Xatırladaq ki, 27 yanvar tarixində Azərbaycanın İrandakı səfirliyinə terror hücumu baş vermişdi. Bu vaxt “Kalaşnikov” markalı avtomatla silahlanan şəxs Mühafizə Xidmətinin rəisi, baş leytenant Orxan Əsgərovu qətlə yetirmiş, daha iki nəfəri isə yaralamışdı.
Prezident İlham Əliyevin Sərəncamına uyğun olaraq, şəhid Orxan Əsgərov (ölümündən sonra) “Vətən uğrunda” medalına layiq görülüb.
