Bu gün şəhid Könül Məmmədov və İlqar Mikayılovun doğum günüdür.
Könül Tofiq oğlu Məmmədov 1 iyun 1969-cu ildə Gəncədə anadan olub. Orta təhsilini 44 saylı orta məktəbdə alıb. Milli azadlıq hərəkatında fəal iştirak edib.
26 mart 1994-cü ildə Kəpəz Rayon Hərbi Komissarlığı tərəfindən səfərbərliyə alınıb. 701 saylı hərbi hissədə sıravi atıcı vəzifəsində xidmət edib. Könül Ağdamın bir neçə kəndinin ermənilərdən müdafiəsində fədakarlıq göstərib.
Könül Tofiq oğlu Məmmədov 27 iyun 1994-cü ildə Ağdam rayonunda gedən qanlı döyüşlərin birində şəhidlik zirvəsinə ucalıb.
İlqar Bəhlul oğlu Mikayılov 1 iyun 1972-ci ildə Gəncədə anadan olub. 37 saylı orta məktəbdə 8-ci sinfə qədər oxuduqdan sonra 9 saylı texniki-peşə məktəbində qaynaqçı sənətinə yiyələnib. 1990-1992-ci illərdə Voroşilovqrad vilayətində həqiqi hərbi xidmətdə olub.
1992-ci ildə Gəncəyə qayıdan İlqar könüllü olaraq cəbhəyə yollanıb. 123 saylı hərbi hissənin tərkibində Tərtər, Ağdərə bölgəsində vuruşub.
İlqar Bəhlul oğlu Mikayılov 12 yanvar 1993-cü ildə Araqadzor uğrunda gedən qanlı döyüşdə şəhidlik zirvəsinə ucalıb.
