Gəncədə dəyirmi masa keçirilib. Bu haqda 9 avqust tarixində İcra hakimiyyətinə istinadən xəbər veririk.
Tədbir “Heydər Əliyev İli” ilə bağlı İcra Hakimiyyətinin başçısı tərəfindən təsdiq edilmiş “Tədbirlər Planı”na uyğun olaraq, “Heydər Əliyev və Azərbaycan dili” mövzusunda keçirilib.
Burada İcra Hakimiyyətinin başçısı Niyazi Bayramov, AMEA-nın Gəncə Bölməsinin sədri Fuad Əliyev, YAP Gəncə şəhər təşkilatının sədri Bayram Aslanov, Bitki Mühafizə və Texniki Bitkilər Elmi-Tədqiqat İnstitutunun direktoru İbrahim Cəfərov, Gəncə Dövlət Universitetinin müəllimi, dilçi alim Yadigar Əliyev, İcra Hakimiyyəti başçısı Aparatının məsul əməkdaşları, o cümlədən AMEA Gəncə Bölməsinin və şəhərdə fəaliyyət göstərən universitetlərin nümayəndələri iştirak ediblər.
Öncə Niyazi Bayramov çıxış edərək bildirib ki, Azərbaycan dilinin həm ümumxalq dili, həm də dövlət dili kimi inkişafında ulu öndər Heydər Əliyevin misilsiz xidmətləri olub və bu siyasət Prezident İlham Əliyev tərəfindən uğurla davam etdirilir.
Daha sonra Fuad Əliyev, İbrahim Cəfərov və Bayram Aslanov da ümummilli lider Heydər Əliyevin Azərbaycan dilinin inkişafındakı töhfələrini qeyd ediblər.
Dəyirmi masa dilçi alim Yadigar Əliyevin və GDU-nun müəllimi Aygün Əhmədovanın məruzələri ilə yekunlaşıb.
