Xəbər verdiyimiz kimi Şəmkirdə ağır yol-nəqliyyat hadisəsi baş verib.
Gencexeber.az-ın məlumatına görə, hadisə Şəmkir-Sabirkənd-Zəyəm yolunda qeydə alınıb. Zəngilan rayon sakini, 33 yaşlı Sucəddin Şükürlünün idarə etdiyi "Tofaş Şahin" markalı avtomobil idarəetmədən çıxaraq yol kənarında olan ağaca çırpılıb. Qəzada sonra avtomobil yolun kənarına aşıb.
Nəqliyyat vasitəsinin daxilində olan üç hərbçidən biri - İsmayıllı rayon sakini, 38 yaşlı Altun Mustafayev hadisə yerində ölüb. Sürücü və digər iki hərbçi isə xəsarət alaraq Şəmkir rayon mərkəzi xəstəxanasına yerləşdiriliblər.
Qeyd edək ki, qəzaya düşən hərbçilər Şəmkirdə Müdafiə Nazirliyi orta ixtisas təhsili pilləsinə ("Gizir hazırlığı kursu"na) gedirmiş. Hadisə yerində dünyasını dəyişən 1988-ci il təvəllüdlü Altun Vəfadar oğlu Mustafayev 11 və 13 yaşlarında iki övlad atası idi.
Yaralıların kimliyi barədə Gencexeber.az-a TƏBİB-dən verilən məlumata görə, qəza zamanı xəsarət alanlar avtomobillin sürücüsü – Zəngilan rayon sakini, 33 yaşlı Sucəddin Şükürlü, eləcə də sağ qalan digər sərnişinlər - Quba rayon sakini, 32 yaşlı Samir Qurbanov və Şamaxı rayon sakini, 29 yaşlı Namiq Əsgərovdur.
Faktla bağlı araşdırma aparılır.
