Gəncədə ictimai iaşə dövriyyəsi və ödənişli xidmətlər artıb. Bu haqda 14 avqust tarixində Fed.az-a istinadən xəbər veririk.
Gəncə şəhər Statistika İdarəsi restoranların dövriyyəsi ilə bağlı məlumat paylaşıb. Bildirilib ki, cari ilin yanvar-iyun aylarında ictimai iaşə dövriyyəsinin həcmi əvvəlki ilin eyni dövrü ilə müqayisədə 23,5 faiz artıb. Vəsait 20 milyon 699,5 min manat təşkil edib. Onların 20 milyon 600 min manatı fiziki şəxslərin hesabına olub.
Sözügedən müddət ərzində ödənişli xidmətlərin dəyəri keçən ilə nisbətən 15,1 faiz artıb və 251 milyon 493,2 min manat təşkil edib. Onların 63 milyon 292,2 min manatı hüquqi şəxslər tərəfindən göstərilib. Bu da ümumi göstəricinin 25,2 faizini təşkil edir.
Ödənişli xidmətlərin 14,8 faizi dövlət, 85,2 faizi isə qeyri-dövlət mülkiyyətindən ibarət olub.
