Gəncə gimnastları yurda medallarla qayıdıblar. Bu haqda 8 iyun tarixində “Kəpəz” televiziyasına istinadən məlumat veririk.
Bakıda bədii gimnastika üzrə birincilik təşkil olunub. Burada 130-a yaxın gimnast iştirak edib. Yarışda Gəncədən 4 idmançı qüvvəsini sınayıb. Onların hər biri mükafatçılar sırasında yer alıb.
Gənclər arasında lentlə hərəkətlərdə Nəzrin Məmmədova bürünc mükafata yiyələnib. 2011-cı il təvəllüdlü gimnastların yarışında gürzlərlə hərəkətdə Əfruz İbrahimova gümüş, topla hərəkətdə Turanə Məmmədova isə bürünc medal qazanıblar. Nizami yurdundan ən yaxşı nəticəni isə Nazlı Məmmədzadə göstərib. O, alətsiz çıxışlarda bütün rəqiblərini üstələyərək yarışın qalibi olub.
Qeyd edək ki, gimnastlarımız 17-18 iyunda Bakıda keçiriləcək beynəlxalq turnirdə şəhərimizi təmsil edəcəklər.
