Gəncənin mərkəzində, Heydər Əliyev prospektində yerləşən tarixi Şah Abbas məscidinin ətrafı hasarlanır.
Gencexeber.az-ın məlumatına görə, Cümə məscidi kimi də tanınan və dövlət tərəfindən tarixi abidə kimi qorunan tikilidə təmir-bərpa işlərinin aparılması üçün 1,6 milyon manat vəsait ayrılıb.
Bu barədə Prezident İlham Əliyev Sərəncam imzalayıb. Vəsait Prezidentin ehtiyat fondundan Dini Qurumlarla İş üzrə Dövlət Komitəsinə ayrılıb.
Hazırda məscidin yerləşdiyi ərazidə hazırlıq işlərinə başlanılıb. Yaxın zamanda tarixi ibadət ocağında rekonstruksiya işlərinin aparılması gözlənilir.
Qeyd edək ki, Şah Abbas məscidi və ya Gəncə Cümə məscidi Gəncəçayın sol sahilində, şəhərin tarixi mərkəzində yerləşir. XVII əsrə aid olan məscid Arran memarlıq üslubunda 1606-cı ildə Səfəvi hökmdarı I Şah Abbasın əmri ilə memar Şeyx Bahəddin Məhəmməd Amilinin layihəsi əsasında tikilib.
