Gəncənin memarlıq simvollarından birinə çevrilən məşhur "Butulkalı ev"in yerləşdiyi ərazinin satışa çıxarıldığı iddia edilir.
Gencexeber.az məlumat verir ki, Gəncə şəhərinin tam mərkəzində, Hüseyn Cavid küçəsi ilə Qəmbər Hüseynli küçəsinin kəsişməsində yerləşən və şəhərdə "Butulkalı ev" kimi tanınan tikili ilə bağlı sosial şəbəkələrdə fəaliyyət göstərən elan səhifələrində məlumat yayılıb.
Elana əsasən, 25 sot torpaq sahəsi və üzərində yerləşən bina satışa çıxarılıb. Ərazinin otel, ofis və ya ticarət mərkəzi üçün əlverişli olduğu qeyd edilib. Elan sahibinin məlumatına görə, 1 sot torpağın qiyməti 80 min manatdır. Bu hesabla 25 sot ərazinin ümumi satış qiyməti 2 milyon manat təşkil edir.
Əldə etdiyimiz məlumata əsasən, "Butulkalı ev" həmin ərazidə tanınmış obyekt kimi göstərilib. Satılan isə memarlıq incisi deyil, onun qarşısında yerləşən və üzərində ev olan geniş torpaq sahəsidir.
Məlumat üçün bildirək ki, Gəncənin illər ərzində memarlıq simvollarından birinə çevrilən "Butulka evi"nin tarixçəsi də olduqca maraqlıdır. Tikili İbrahim Cəfərovun fantaziyası əsasında 1966–1967-ci illərdə inşa edilib. O, evi müharibədə itkin düşmüş qardaşı Yusif Cəfərovun xatirəsinə yaradıb.
26 yaşında əsgər gedən və müharibədən geri qayıtmayan qardaşının bir gün bu evin sorağını eşidərək geri dönəcəyinə ümid edən İbrahim Cəfərov tikiliyə xüsusi məna verib.
Evin inşasında şampan şüşələrindən tutmuş kiçik dərman şüşələrinə qədər 48 min boş şüşədən istifadə edildiyi bildirilir. Tikilinin arxa hissəsində rus dilində "Vətənin naməlum əsgərinə eşq olsun!" yazısı da yer alır.
Bir müddət əvvəl İbrahim Cəfərovun yadigar qoyduğu evdə onun gəlini və nəvələrinin yaşadığı qeyd olunurdu.
