Gəncənin Cavadxan qəsəbəsində, Cücə zavodunun yaxınlığında nəzərdə tutulmamış tullantı sahəsi əmələ gəlib.
Gencexeber.az-a müraciət edən vətəndaşların sözlərinə görə, əraziyə mütəmadi olaraq müxtəlif növ tullantılar atılır. Nəticədə həmin yer kəskin və xoşagəlməz qoxu mənbəyinə çevrilib.
Sakinlər bildirirlər ki, xüsusilə gecə saatlarında tullantıların yandırılması vəziyyəti daha da ağırlaşdırır. Tüstü ətraf ərazilərə yayılır və yaxınlıqda yaşayan insanların narahatlığına səbəb olur.
Habelə, üfunət və tüstü səbəbindən pəncərələri açmaq mümkün deyil. Ərazidən piyada və avtomobillə keçən insanlar də kəskin qoxuya görə burnunu tutmadan hərəkət etməkdə çətinlik çəkirlər.
Sakinlər aidiyyəti qurumlardan ərazidə yaranmış qanunsuz tullantı sahəsinin aradan qaldırılmasını, zibillərin yandırılmasının qarşısının alınmasını və zibil konteynerlərinin yerləşdirilməsini xahiş edirlər.
