Gəncənin Gülüstan qəsəbəsində yerləşən 4 nömrəli binanın sakinləri uzun illərdir həllini tapmayan problemlərlə üz-üzə qaldıqlarını bildirirlər.
Gencexeber.az-a daxil olan məlumata görə, yağışlı havalarda binanın qarşısında hərəkət etmək demək olar ki, mümkün olmur. Uzun illər əvvəl çəkilmiş asfalt örtüyü tamamilə yararsız hala düşdüyündən ərazidə iri çuxurlar və gölməçələr yaranır.
Sakinlər bildirirlər ki, uşaqların asudə vaxtını keçirməsi üçün də uyğun şərait yoxdur. Onların sözlərinə görə, həyətin abadlaşdırılmasına və oyun sahələrinin yaradılmasına ehtiyac var.
Bundan əlavə, binanın girişləri, fasadı və zirzəmisinin də vəziyyəti qənaətbəxş deyil. Sakinlər qeyd edirlər ki, binada əsaslı təmir aparılmayıb.
Onlar aidiyyəti qurumlardan ərazidə abadlıq işlərinin görülməsini, asfalt örtüyünün yenilənməsini və binanın ümumi vəziyyətinin yaxşılaşdırılmasını xahiş edirlər.
