Gəncədə avtobus dayanacaqlarında pavilyonların yoxluğu narazılıq yaradır.
Gencexeber.az məlumat verir ki, ötən ilin sonlarında ictimai nəqliyyat sahəsində həyata keçirilən islahatlar çərçivəsində Gəncə şəhərinə "BakuBus" MMC-nin yeni, müasir tələblərə cavab verən avtobusları gətirilib.
Lakin onların yalnız dayanacaqlarda sərnişin götürüb-düşürməsinə baxmayaraq, şəhərin bir çox ərazilərində dayanacaq yerləri yalnız "BUS" nişanı ilə müəyyən edilir, pavilyonlar isə yoxdur.
Sakinlərin sözlərinə görə, soyuq və yağışlı günlərdə vətəndaşlar avtobusu açıq havada gözləməyə məcbur qalır, nəticədə isə tamamilə islanırlar.
Şikayətçilər bildirirlər ki, mövcud vəziyyət dəyişməzsə, yaxın aylarda havaların isinməsi ilə dayanacaqlarda gözləyən vətəndaşlar bu dəfə də yandırıcı günəş şüalarından qoruna bilməyəcəklər.
Sakinlər aidiyyəti qurumlardan problemin həllini, bütün avtobus dayanacaqlarında pavilyonların quraşdırılmasını gözləyirlər.
