Türkiyə vətəndaşı Metin Şare Gəncədə dələduzluqla üzləşdiyini iddia edir.
Gencexeber.az bildirir ki, Metin Şare evlənmək məqsədilə tanış olduğu qadına və onun yaxınlarına ümumilikdə 67 min manata yaxın pul göndərib.
Onun sözlərinə görə, qadının istəyi ilə müxtəlif şəxslərin adına pul köçürüb, sonra isə Azərbaycana gəlib:
"Evimi, maşınımı satıb, bura gəldim. Almağım üçün bir ev göstərdilər, 23 min manata razılaşdıq. Pulları aldıqdan sonra isə dedilər ki, buranı tərk et, yoxsa səni deportasiya etdirəcəyik. 20 gündür acam, küçələrdə qalmışam".
Qarşı tərəf isə ittihamları qəbul etmir. Aişə Orucova bildirir ki, Metin Şare birlikdə yaşadıqları müddətdə xərclədiyi pulu geri istəyir və onu təhdid edir.
"Mənə bıçaq çıxarıb, barmağım kəsildi. Məni dəfələrlə təhdid edib, xərclədiyi pulları geri istəyib. Deyir ki, hamısını qaytarmasan, səni öldürəcəyəm, evini yandıracağam", – deyə ittiham olunan şəxs söyləyib. Məsələ ilə bağlı Daxili İşlər Nazirliyinin mətbuat xidmətinin Gəncə regional qrupundan bildirilib ki, Metin Şare tanışı olan qadın tərəfindən pulunun mənimsənildiyi barədə polisə müraciət edib. Daha sonra isə qarşı tərəfin ona 1300 manat qaytardığını və artıq şikayətçi olmadığını bildirib.
