Gəncəli tələbə Rusiyada öz zehni və erudisiyası ilə böyük uğura imza atıb.
Gencexeber.az-ın məlumatına görə, Rusiyanın Stavropol şəhərində Ümumrusiya "StudRussia" müsabiqəsi baş tutub. Tədbir Rusiya Elm və Ali Təhsil Nazirliyinin dəstəyi ilə Moskva Elm və Texnologiyalar Universiteti tərəfindən təşkil olunub. Yarışda Rusiya Federasiyasının müxtəlif bölgələrindən tələbələr iştirak ediblər.
Gəncə şəhərindən olan tələbə Natella Həsənova "Elmin gələcəyi" nominasiyasında III yerə layiq görülüb.
Qeyd edək ki, Volqoqrad Dövlət Universitetinin hüquq fakültəsində təhsil alan 4-cü kurs tələbəsi beynəlxalq hüquq, cinayət hüququ, cinayət prosessual hüququ, kriminologiya, kriminalistika, mülki hüquq, ekologiya hüququ, torpaq hüququ, mülki prosessual hüquq və digər sahələrdə 50-dən çox elmi məqalənin müəllifidir.
Gəncin elmi işləri VAK və Rusiya Elmi İstinad İndeksi jurnallarında dərc olunub. Gəncəli tədqiqatçı həmçinin müxtəlif olimpiada və müsabiqələrdə uğurla iştirak edib.
