“Mənim üçün ən böyük fəxr odur ki, Almaniyada hər döyüşdə Azərbaycanın bayrağını qaldırıram. Bu, mənim üçün şərəf və qürurdur”.
Bunu Gencexeber.az-a müsahibəsində əslən gəncəli olan, 9 ildir Almaniyada yaşayan 18 yaşlı kikboksçu Rəşad Vəliyev deyib.
Müsahibəni təqdim edirik:
- Kikboksinqə necə başladınız?
- Almaniyada atamın dostu, üç qat Avropa çempionu Eltac Hümbətov yeni idman zalı açdı və onun ilk tələbəsi oldum.
- Bu idmana marağınızı yaradan nə oldu?
- Babam güləşçi olub. Atam da kikboksinqlə məşğul olub. İdmana sevgim qanımdan gəlib.
- İlk məşq gününü necə xatırlayırsınız?
- İdmana getməsəm də, evdə həmişə atamla edirdim, ona görə adi qarşıladım.
- Gündəlik məşq cədvəliniz necədir?
- Həftədə 4 dəfə idman edirik, yarışdan öncə isə hər gün məşq edirik.
- Qidalanma və bərpa proseslərinə necə diqqət yetirirsiniz?
- Bir idmançı üçün qidalanma yüksək səviyyədə olmalıdır. Mən özüm çox şükür ki, normal qidalanıram.
- İdman əsas fəaliyyət sahənizdir? Gününüzü necə planlayırsınız?
- Həm işləyirəm, həm də idmanla məşğulam oluram. Bu yöndə atam mənə çox kömək edir və hər iksinə vaxtında çatıram.
- Ən yadda qalan döyüşünüz hansıdır və niyə?
- 9 döyüşüm olub, onlardan 7-sini nokautla qazanmışam. Bütün döyüşlərimdə yadda qalan fəndlər işlədirəm.
- Rəqib qarşısında qorxu və ya stres hiss etdiyiniz anlar olubmu? Necə öhdəsindən gəlmisiniz?
- Az da olsa həyəcan olur, amma heç vaxt döyüşməkdən qorxmamışam.
- İndiyə qədər qazandığınız ən böyük uğur nə olub?
- İki dəfə WAKO Almaniya çempionu olmuşam. Kyokuşin karate üzrə beynəlxalq turnirin qalibi olmuşam. 2024-ci ildə isə Almaniyada məskunlaşdığım şəhərin ən yaxşı idmançısı adına layiq görülmüşəm.
- Ən çətin anınız nə vaxt olub və bu vəziyyətdən necə çıxdınız?
- Bütün döyüşlərdə atam və idmançı dostlarım mənimlə olub və bu mənim üçün çətin olan hər şeyi aradan qaldırıb.
- Özünüzü motivasiya etmək üçün hansı üsullardan istifadə edirsiniz?
- Yarışlara çox yaxşı hazırlaşıram. Bu, mənim özümə güvənimi artırır. Müəllim də mənə çox kömək edir.
- Tez-tez zədələnirsiniz?
- Əlim iki dəfə sınıb. Bununla yanaşı ayaq barmaqlarımda da sınıqlar var. Bu, bir idmançı üçün düşünürəm ki, normaldır.
- Gələcəkdə hansı yarışlara qatılmaq istəyirsiniz?
- Aprelin 25-də WAKO kikboksinq üzrə Almaniya çempionatına qatılacağam və inşallah ki, qələbə qazanacağam.
- Bu sahəyə yeni başlayanlara nə məsləhət verərdiniz?
- Tövsiyələrim budur ki, yeniyetmələr idmanla məşğul olsunlar və Allah hamısına kömək etsin. O imkanları onlara qismət etsin.
- Kikboksinqin həyatınıza ən böyük təsiri nə olub?
- Mənim üçün ən böyük fəxr odur ki, Almaniyada hər döyüşəndə Azərbaycanın bayrağını qaldırıram. Bu, mənim üçün şərəf və qürurdur.
- Yaşadığınız şəhərdə 2024-cü ilin idmançısı adına layiq görülmüsünüz, bu barədə danışardınız.
- Bəli, yaşadığım Zaltskotten şəhərinin meri tərəfindən mənə dəvət gəldi və o tədbirə qatıldım. 90 namizəd arasında üç nəfər ilin idmançısı adına layiq görüldü. Onlardan biri də mən idim.
- Almaniyada məşq şəraiti necədir? Azərbaycandakı şəraitlə müqayisə etsəniz, nə deyə bilərsiniz?
- Burda şərait yüksək səviyyədədir. Müqayisə edə bilmərəm, çünki mən oradan uşaqlıqdan çıxmışam.
- Alman cəmiyyətinə uyğunlaşmaq çətin oldumu?
- İlk zamanlar çətin oldu. Sonralar get-gedə hər şey normala döndü. Müəllimimiz azərbaycanlıdır. İdmançı dostlarımdan da azərbaycanlılar çoxdur. Zalda olan zaman özümü Almaniyada hiss etmirəm.
- Alman dilini öyrənməkdə çətinlik çəkdinizmi?
- Uşaq idim. Məktəbə gedəndə dili öyrənmək çətin olmadı. Çünki uşaqların beyni daha təmiz, qavramaları daha güclü olur və bu, mənim üçün asan oldu.
- İdmançı olaraq oradakı mədəniyyət fərqləri sizi necə təsir etdi?
- Burada intizama çox önəm verilir və yaşadıqca bunların mədəniyyətini, ciddiliyini qəbullanırsan, bu, çox gözəldir.
- Komanda yoldaşlarınız və məşqçilərlə münasibətləriniz necədir?
- Müəllim Eltac Hümbətov atamın dostudur. Fürsətdən istifadə edib ona demək istəyirəm ki, sizinlə fəxr edirəm. Eltac müəllim bizi öz doğması kimi hazırlaşdırır. Bizimlə münasibəti də çox gözəldir.
- Xaricdə idman karyerası qurmaq istəyənlər üçün hansı məsləhətləriniz var?
- Onun üçün sırf həmin ölkədə yaşamalısan. Amma yaşım az olduğundan tam olaraq karyera qurmaq yolunu izah edə bilmərəm.
Nəzrin Vahid
