Gəncədə məişət tullantıları poliqonunun hər gün yandırılması şəhərin ən böyük yaşayış massivlərindən biri olan Cavad Xan qəsəbəsinin sakinləri üçün ciddi problemə çevrilib.
Gencexeber.az-a daxil olan şikayətlərə görə, Gəncənin məişət tullantıları poliqonunda yandırılan məişət tullantılarından yayılan üfunət qəsəbəni bürüyür. Sakinlər bildirirlər ki, məsələ ilə bağlı dəfələrlə aidiyyəti qurumlara məlumat verilib. Onların sözlərinə görə, poliqonun ayrı-ayrı hissələrində tullantılar növbə ilə yandırılır.
Digər narazılıq məişət tullantılarının daşınması ilə bağlıdır. Belə ki, tullantıların daşınması zamanı bir hissəsi avtomobillərdən qəsəbənin yollarına tökülür. Halbuki poliqonun ümumi sahəsi kifayət qədər böyükdür.
Məişət tullantıları poliqonu Gəncə Şəhər İcra Hakimiyyəti yanında Mənzil-Kommunal İstehsalat Birliyinin nəzdində fəaliyyət göstərir. Qurumun açıqlamasına görə, tullantıların daşınması zamanı müəyyən miqdarda məişət tullantısının küçələrə tökülməsi təbii hal kimi qiymətləndirilir.
Məsələnin digər tərəfi isə ölkədə bərk məişət tullantılarının idarə olunması ilə bağlı yeni sistemin yaradılmasıdır. "Azərbaycan Respublikasında bərk məişət tullantılarının idarə edilməsinin təkmilləşdirilməsinə dair 2027–2030-cu illər üçün Milli Strategiya" layihəsinin hazırlanması ilə bağlı müvafiq tapşırıq verilib.
Bu məqsədlə Ekologiya və Təbii Sərvətlər Nazirliyi tərəfindən Asiya İnkişaf Bankının dəstəyi ilə Milli Strategiya layihəsinin hazırlanmasına, eləcə də ölkədə bərk məişət tullantılarının idarə edilməsi sahəsində mövcud vəziyyətin qiymətləndirilməsinə başlanılıb.
Görünən odur ki, Cavad Xan qəsəbəsinin sakinləri poliqonla bağlı problemlərin həlli üçün hələ bir müddət gözləməli olacaqlar.
