Gəncənin avtomobil yollarında hər gün səhər saatlarında yaşanan ciddi problemlərdən biri marketlərə mal çatdıran yük maşınları ilə bağlıdır.
Gencexeber.az-a daxil olan şikayətlərə görə, şəhərin müxtəlif hissələrində, ələlxüsus da mərkəzi ərazilərdə, hərəkətin intensiv olduğu küçə və prospektlərdə marketlərə mal gətirən yük avtomobilləri yolun hərəkət hissəsində saxlanılır. Nəticədə zolaqlardan biri tamamilə zəbt olunur ki, bu da nəqliyyatın hərəkətini çətinləşdirir və tıxacların yaranmasına səbəb olur.
Bu vəziyyətdən əziyyət çəkənlər sırasında yalnız minik avtomobillərinin sürücüləri deyil, eyni zamanda şəhərdə fəaliyyət göstərən "Bakubus" MMC-nin avtobuslarından istifadə edən sərnişinlər də var. Bildirilir ki, avtobusların ölçüləri digər nəqliyyat vasitələri ilə müqayisədə daha böyük olduğundan, yük maşınlarının yaratdığı süni maneələri aşmaq çətinləşir. Bu isə həm sürücülərdə gərginlik yaradır, həm də avtobusların qrafikdən geri qalmasına səbəb olur. Nəticədə sərnişinlərin də mənzil başına vaxtında çatmasında çətinlik yaranır.
Qeyd olunan problem xüsusilə hər gün səhər saat 08:00-dan etibarən Mirzə Abbas Abbaszadə küçəsi ilə Heydər Əliyev prospektinin kəsişməsində müşahidə olunur. İddialara görə, yaranan sıxlıq bəzən Atatürk prospektinin kəsişməsinə qədər uzanır.
Vətəndaşlar aidiyyəti qurumlardan problemin aradan qaldırılması üçün tədbir görmələrini tələb edirlər.
