Gəncə şəhərində bir neçə küçənin sakinləri yaşadıqları ərazidə yol və ictimai nəqliyyat probleminin həll olunmamasından narazıdırlar.
Gencexeber.az məlumat verir ki, söhbət Qırmızı Kənd qəsəbəsində yerləşən Hüseyn Hüseynli, Çərkəz Həsənov və Qəmərli küçələrindən gedir. Sakinlərin sözlərinə görə, ərazidə asfalt örtüyü yoxdur. Yağıntılı hava şəraitində küçələrdə iri gölməçələr yaranır, yollar palçığa qərq olur. Bu isə həm piyadaların, həm də avtomobillərin hərəkətində ciddi çətinlik yaradır.
Bundan başqa, sakinlər ərazidə ictimai nəqliyyatın işləməməsindən də şikayətçidirlər. Onların bildirdiyinə görə, bu səbəbdən gündəlik gediş-gəlişdə, xüsusilə məktəblilər, yaşlılar və işə gedən sakinlər üçün əlavə problemlər yaranır.
Şikayətçilər qeyd edirlər ki, məsələ ilə bağlı aidiyyəti dövlət qurumlarına müraciət etsələr də, hələlik müsbət nəticə əldə olunmayıb. Sakinlər yolların təmir olunması, həmçinin ictimai nəqliyyatın təşkili istiqamətində tədbir görülməsini istəyirlər.
Azərbaycan Yerüstü Nəqliyyat Agentliyindən (AYNA) Gencexeber.az-a bildirilib ki, sözügedən ərazidə yol infrastrukturu qənaətbəxş deyil: "Yol infrastrukturu ictimai nəqliyyat vasitələrinin təhlükəsiz və sərbəst hərəkəti, manevr etməsi üçün imkan verdiyi təqdirdə marşrutla əlaqələndirmə məsələsinə baxıla bilər".
Gəncə Şəhər İcra Hakimiyyəti redaksiyamıza açıqlamasında isə ərazidə yaşayan sakinlərin qəbul edildiyi, onların müraciətlərinin diqqətlə dinlənildiyi bildirilib: "Müraciətlər əsasında aidiyyəti qurumların nümayəndələri tərəfindən əraziyə yerində baxış keçirilmişdir. Aparılan baxışın nəticələrinə uyğun olaraq sakinlərə məlumat verilmişdir ki, Gəncə şəhərində həyata keçirilən abadlıq və yenidənqurma tədbirləri çərçivəsində küçə və prospektlərin mərhələli şəkildə asfaltlanması nəzərdə tutulmuşdur. Növbəti mərhələdə qeyd olunan ərazidə asfalt işləri görüləcəkdir".
