Gəncə şəhərində yerləşən 2 nömrəli uşaq xəstəxanasının qarşısında gecə saatlarında baş verən səs-küy və atəşfəşanlıq sakinlərin ciddi narazılığına səbəb olub.
Gencexeber.az-a daxil olan şikayətə əsasən, hadisə gecə saat 00:00 radələrində xəstəxananın qarşısında yerləşən "Dan Ulduzu - Piramida Dəniz Restoranlar Şəbəkəsi" şadlıq sarayında qeydə alınıb. Bildirilir ki, həmin vaxt ərazidə fişənglər partladılıb, yüksək səslər isə xəstəxanada müalicə alan uşaqların və onların valideynlərinin narahatlığına səbəb olub.
Şikayətçi qeyd edir ki, bu hal xüsusilə "31 Mart – Azərbaycanlıların Soyqırımı Günü"nə təsadüf etdiyindən daha həssas qarşılanıb: "Bu gün anım günüdür. Amma bu gün, təəssüf ki, Gəncədə fişəng partladılması ilə başladı. Xəstə körpələri güclə yatırırıq, səsdən hamısı diksinib. Burdakılar ən az mənim qədər qorxdu və əsəbiləşdi."
Sakinlərin sözlərinə görə, gecə saatlarında belə yüksək səsli tədbirlərin keçirilməsi həm xəstələrin vəziyyətinə mənfi təsir göstərir, həm də ictimai asayişin tələblərinə uyğun deyil.
Vətəndaşlar məsələ ilə bağlı videogörüntüləri redaksiyamıza təqdim edib və aidiyyəti qurumlardan zəruri tədbirlərin görülməsini istəyir.
