Gəncə şəhərində bir-birinə paralel olan Mirzə Abbas Abbaszadə və Əşrəf Yusifzadə küçələrinin arasında yerləşən, köhnə hərbi hospitala aid ərazi baxımsız vəziyyətdədir.
Gencexeber.az məlumat verir ki, sözügedən sahə Azərbaycan Dövlət Aqrar Universitetinin arxasında, İsmət Qayıbov adına 1 nömrəli tam orta məktəbin isə birbaşa qarşısında yerləşir.
Redaksiyamıza daxil olan şikayətlərə əsasən, uzun müddətdir təmizlənməyən ərazi məişət tullantıları ilə dolub və faktiki olaraq zibilliyə çevrilib. Sakinlərin sözlərinə görə, yayılan kəskin üfunət iyi səbəbindən yaxınlıqdakı evlərdə pəncərə açmaq mümkün deyil. Xüsusilə isti havalarda vəziyyət daha da ağırlaşır.
Qeyd olunur ki, ərazi həm məktəb, həm də ali təhsil müəssisəsinin yaxınlığında yerləşdiyindən bu hal şagirdlər və tələbələr üçün ciddi sanitar təhlükə yaradır. Eyni zamanda gecə saatlarında ərazinin qaranlıq qalması əlavə narahatlıq doğurur.
Sakinlər aidiyyəti qurumlardan ərazidə təmizlik və abadlıq işlərinin aparılmasını, eləcə də məişət tullantılarının tam şəkildə yığışdırılmasını xahiş edirlər.
