"Gəncədə Küçə İşıqlandırma şöbəsinin ləğvi ilə bağlı yayılan məlumatlar tamamilə əsassızdır"
Gencexeber.az xəbər verir ki, bu barədə Gəncə Şəhər Mənzil Kommunal Təsərrüfatı İstehsalat Birliyinin açıqlamasında bildirilir.
"Qurumun tabeliyində fəaliyyət göstərən Küçə İşıqlandırma şöbəsinin ləğv ediləcəyi və şöbədə çalışan təxminən 150-yə yaxın əməkdaşın əmək müqaviləsinə xitam verilməsi kimi məlumatlar əsassızdır.
Şəhər Mənzil Kommunal Təsərrüfatı İstehsalat Birliyində və tabeli şöbələrində Nazirlər Kabinetinin müvafiq qərarına uyğun olaraq strukturun optimallaşdırılması prosesi aparılır. Belə ki, mövcud qərara uyğun olaraq, MKTİB-nin bütün şöbələrində işçilərin ştat vahidi ilə bağlı kriteriyalar müəyyən olunub.
Küçə İşıqlandırma şöbəsinin mövcud olan 72 ştat vahidində işçilərin optimallaşdırılması aparılır. Misal üçün, əgər işçi aidiyyəti şöbənin elektromontajçısı vəzifəsində çalışırsa, onun bu vəzifəyə uyğun sertifikatı olmalıdır. Bununla da iyun ayının sonuna qədər MKTİB-də optimallaşdırılma istiqamətində işlər yekunlaşmalı və iyul ayının 1-dən etibarən yeni Məhdud Məsuliyyətli Cəmiyyətin yaranması nəzərdə tutulub", – qurum əlavə edib.
Qeyd olunur ki, bundan sonra İB-də müasir tələblərə cavab verən və peşəkar iş təcrübəsinə malik əməkdaşlarla yeni müqavilələr bağlanacaq. Habelə əmək müqaviləsinə xitam verilməsi nəzərdə tutulan əməkdaşlara, qanunvericiliyə uyğun olaraq, həftədə 1 gün yeni iş yerlərinin axtarışına icazə verilir, həmçinin onlar qanunvericiliyin tələblərinə uyğun olaraq dövlət tərəfindən müavinətlərlə təmin ediləcəklər.
