Gəncədə Heydər Əliyev Park-Kompleksi ərazisində yerləşən və yenidən istifadəyə verilməsi gözlənilən süni gölün ətrafındakı antisanitar vəziyyət diqqət çəkir.
Gencexeber.az-a daxil olan görüntülərə əsasən, gölün ətrafında plastik butulkalar, sellofan torbalar və müxtəlif məişət tullantıları müşahidə edilir. Ərazidəki yaşıllıqlara da uzun müddətdir qulluq göstərilmədiyi görünür.
Sakinlərin sözlərinə görə, yaranan vəziyyət həm parkın estetik görünüşünə xələl gətirir, həm də ətraf mühitə mənfi təsir göstərir. Halbuki Heydər Əliyev Park-Kompleksi gəıncəlilərin və qonaqların ən çox üz tutduğu istirahət məkanlarından biri hesab olunur.
Vətəndaşlar aidiyyəti qurumlardan göl ətrafının və yaşıllıq sahələrinin təmizlənməsi, tullantıların yığışdırılması və parkda mütəmadi təmizlik işlərinin aparılması üçün müvafiq tədbirlər görülməsini xahiş edirlər.
Qeyd edək ki, 6 hektar əraziyə malik süni göl 2023-cü ilin yaz aylarında qonşu rayonlardan gələn sel suları nəticəsində daşaraq ətraf yaşayış sahələri üçün təhlükə yaratmışdı. Dibi lil və palçıqla dolan gölün suyu həmin vaxt aidiyyəti qurumlar tərəfindən tamamilə çəkilmişdi.
2024-cü ildə Azərbaycan Dövlət Su Ehtiyatları Agentliyinin tabeliyində fəaliyyət göstərən Regional Su Meliorasiya Xidmətinin sifarişi əsasında ərazidə təmir-bərpa işləri həyata keçirilib. İşlər çərçivəsində 380 metr uzunluğunda suötürücü boru çəkilib, həmçinin gölün yamacları beton tavalarla üzlənib. Həmin ilin dekabr ayında isə obyektin təhvil verilməsi gözlənilirdi. Eyni zamanda əraziyə müxtəlif balıq növlərinin buraxılmasının planlaşdırıldığı bildirilmişdi.
Əldə etdiyimiz qeyri-rəsmi məlumata görə, artıq bu günlərdə gölə yenidən suyun verilməsinə başlanılıb. Bildirilir ki, növbəti həftənin ortalarına qədər göl tamamilə doldurulacaq və ərazi vətəndaşların asudə vaxt keçirməsi üçün istifadəyə veriləcək.
