Gəncədə 2026–2027-ci tədris ili üçün 2–5 yaşlı uşaqların icma əsaslı məktəbəqədər təhsil qruplarına ödənişsiz qəbulu başlayıb.
Gencexeber.az xəbər verir ki, qruplar Gəncə şəhər Mirzə Şəfi Vazeh adına 16 nömrəli tam orta məktəbdə və Kəlbəcər rayonu 109 nömrəli tam orta məktəbdə təşkil olunacaq.
Tədris prosesi çərçivəsində uşaqlar üçün aşağıdakı imkanlar yaradılacaq:
– dərslər həftədə 4 gün, gündə 2 saat keçiriləcək;
– hər bir uşağa fərdi yanaşma tətbiq olunacaq və intellektual inkişafa xüsusi diqqət ayrılacaq;
– yaradıcı fəaliyyətlər, oyunlar və müxtəlif təlimlər təşkil ediləcək;
– uşaqlar üçün təhlükəsiz və təmiz mühit təmin olunacaq;
– sosial və nitq bacarıqlarının inkişafına dəstək göstəriləcək.
Proqram çərçivəsində uşaqların zehni və intellektual qabiliyyətlərinin, nitq və ünsiyyət bacarıqlarının, motorika və yaradıcılıq qabiliyyətlərinin, həmçinin sosial davranış və özünəinamının inkişaf etdirilməsi nəzərdə tutulur.
Qeyd olunur ki, proqram çərçivəsində dərsliklər və bütün zəruri tədris ləvazimatları dövlət tərəfindən təmin edilir. Valideynlər üçün nəzərdə tutulan təhsil otağından istifadə və proqram çərçivəsində təqdim olunan vəsaitlər də tamamilə ödənişsizdir.
Qəbuldan yararlanmaq istəyən valideynlər qeyd olunan təhsil müəssisələrinə müraciət edə bilərlər.
