Gəncə Şəhər Məhkəməsində son qəbul imtahanlarında qanunsuz texniki vasitələrdən istifadə halları ilə bağlı cinayət işi üzrə təqsirləndirilən təhsil eksperti Kamran Əsədov və tarix müəllimi Gündüz Abbasovun cinayət işi üzrə məhkəmə prosesi keçirilib.
Gencexeber.az bildirir ki, hakim Elçin Məmmədovun sədrlik etdiyi prosesdə şahidlərin dindirilməsi davam edib.
Şahidlərdən Namiq Hüseynov ifadə verərək bildirib ki, Gündüz Abbasovu tanıyıb. O, ifadəsində deyib ki, dostu Ruslan Çobanov adlı şəxsin ona müraciət edərək bacısı qızına imtahanda köməklik etməsi üçün xahiş edib. Bu barədə o, Gəncədə hazırlıq müəllimi kimi tanıdığı G.Abbasova deyib. O da 45 min dollar və ya 77 min manat qarşılığında kömək edə biləcəyini deyib. Nəticədə məbləğ N.Hüseynov tərəfindən G.Abbasova təqdim edilib.
Prosesdə hakim tərəfindən ibtidai istintaqa verilən ifadə xatırladılıb. Məlum olub ki, məbləğ ümumilikdə 110 min dollar həcmində olmalı və hissə-hissə ödənilməli olub.
