Gəncə şəhər Mənzil Kommunal Təsərrüfatı İstehsalat Birliyinin (MKTİB) Yaşıllaşdırma şöbəsinin gülçülük sahəsində yerli mütəxəssislər tərəfindən qış aylarından bəri yetişdirilən müxtəlif adda gül-çiçəklərin şəhərin müxtəlif ərazilərinə əkini davam etdirilir.
Gencexeber.az quruma istinadən məlumat verir ki, yaşıllaşdırma aksiyasının budəfəki ünvanı Nizami Gəncəvi prospekti olub. MKTİB-nin Yaşıllaşdırma şöbəsinin əməkdaşları tərəfindən ərazidə ulduz görüntülü dairələrə türk qərənfilləri əkilib.
Mövcud və yeni əkilən yaşıllıqlara aqrotexniki qulluq göstərilib, suvarılması təmin edilib. Bundan başqa MKTİB əməkdaşları tərəfindən Xan Bağında ağacların budama prosesi həyata keçirilib. İri və orta gövdəli ağacların budaqları aqrotexniki tədbirlər çərçivəsində budanaraq ərazidən xüsusi texnikalar vasitəsilə daşınması təmin edilib.
