Gəncə şəhərinin Sadılı qəsəbəsində məhəllə evlərini çirkab suların basması sakinlərin ciddi narahatlığına səbəb olub. Təxminən 50 metr məsafəni əhatə edən ərazidə uzun müddətdir antisanitar vəziyyət hökm sürür.
Gencexeber.az-a Rəmziyyə Veysəlova küçəsi sakinləri tərəfindən daxil olan çoxsaylı şikayətlərdə bildirilir ki, ərazidən keçən su kanalı məcrasından daşaraq ətrafı çirkaba qərq edib. Sakinlərin sözlərinə görə, buna səbəb kəməri (arxı) qidalandıran Xan arxının müxtəlif tullantılarla çirklənməsidir. Nəticədə çirkab sular və zibillər sözügedən məhəllədə ətrafa dağılır.
Qeyd olunur ki, kanalın içərisi məişət tullantıları, heyvan leşləri və digər zibillərlə doludur. Bu səbəbdən suyun normal axını tamamilə dayanıb, ərazidə kəskin qoxu və antisanitar vəziyyət yaranıb.
Sakinlər bildirirlər ki, problemlə bağlı dəfələrlə aidiyyəti qurumlara müraciət edilsə də, indiyədək əraziyə baxış keçirilməyib, ölçü götürülməyib və hər hansı təmizləmə işləri aparılmayıb.
Vətəndaşlar müvafiq qurumlardan məsələyə operativ reaksiya verilməsini, əraziyə yerində baxış keçirilməsini və çirkab suların qarşısının alınması üçün təcili tədbirlərin görülməsini xahiş edirlər.
