Gəncə şəhərinin Tağı Arani küçəsində, sakinlər arasında "İmperialın dördyolu" kimi tanınan "Dubay bazarı" istiqamətinə gedən yolda antisanitar vəziyyət narazılığa səbəb olub.
Gencexeber.az-a daxil olan çoxsaylı şikayətlərə görə, avtobus dayanacağının düz yaxınlığında yerləşən məişət tullantıları konteynerləri dolub-daşıb. İsti havalarda əraziyə yayılan kəskin üfunət avtobus gözləyən sakinlər üçün ciddi narahatlıq yaradır.
Şikayətçilərin sözlərinə görə, konteynerlərin ətrafına müxtəlif məişət tullantıları atılıb. Hətta bir aya yaxındır ki, ərazidə atılmış unitazın götürülmədiyi bildirilir.
Sakinlər hesab edirlər ki, şəhərin mərkəzi hissəsində belə mənzərənin yaranması yolverilməzdir və aidiyyəti qurumlar ərazidə təmizlik işlərinin aparılmasını, tullantıların vaxtında daşınmasını təmin etməlidirlər.
