Gəncə şəhəri, Poçt qəsəbəsində yerləşən 49, 53, 54, 55, 56, 57 saylı və ətraf yaşayış binalarının həyətindəki vəziyyət sakinlərin narazılığına səbəb olub.
Gencexeber.az-a müraciət edən sakinlərin sözlərinə görə, həyətlərdə yerləşən uşaq əyləncə qurğuları sıradan çıxıb, oyun meydançası isə baxımsızlıqdan dağılıb və hazırda uşaqların istifadəsi üçün yararsız vəziyyətdədir.
Sakinlər həmçinin bildirirlər ki, ərazidə istirahət üçün quraşdırılan skamyalar da yararsız hala düşüb. Nəticədə həm uşaqların təhlükəsiz şəkildə oynaması, həm də sakinlərin həyətdə istirahət etməsi üçün normal şərait qalmayıb.
Müraciət edənlər məsələ ilə bağlı aidiyyəti qurumlara dəfələrlə məlumat verildiyini, lakin indiyədək problemin həlli istiqamətində real tədbir görülmədiyini deyirlər.
Sakinlər həyətin abadlaşdırılmasını, köhnəlmiş uşaq meydançasının yenilənməsini və təhlükəsiz oyun şəraitinin yaradılmasını tələb edirlər.
