Gəncə şəhərində "BakuBus" MMC-yə məxsus 11 nömrəli marşrut avtobusunda insident yaşanıb.
Gencexeber.az-ın məlumatına əsasən, avtobusa səhər saatlarında əqli cəhətdən zəif və üst-başından üfunət gələn yaşlı qadın minib. Qadın uzun müddət — bir neçə saat — avtobusdan düşməyib və eyni marşrut üzrə dəfələrlə dövrə vurub.
Şahidlərin sözlərinə görə, qadın nə gediş haqqını ödəyib, nə də sərnişinlərə reaksiya verib. Onun təbii ehtiyaclarını nəqliyyat vasitəsinin daxilində ödəməsi isə vəziyyəti dözülməz hala gətirib.
"Şəmkir avtovağzalı" dayanacağında sürücü qadını düşürməyə çalışsa da, bu, mümkün olmayıb. Nəticədə əraziyə cəlb edilən polis əməkdaşlarının köməyi ilə qadın avtobusdan çətinliklə endirilib.
