Gəncə şəhər 7 saylı körpələr evi-uşaq bağçasının uşaqları və valideynləri ilə bağlı problem hələ də həllini tapmayıb.
Gencexeber.az-a daxil olan məlumata görə, Üzeyir Hacıbəyli küçəsi 261 ünvanında yerləşən sözügedən bağça 5 ildən çoxdur təmir səbəbilə fəaliyyət göstərmir. Təmir işlərinin başa çatdığı bildirilsə də, müəssisə indiyədək istifadəyə verilməyib.
Bu müddət ərzində uşaqlar və əməkdaşlar Gəncə şəhərindəki 46 saylı körpələr evi-uşaq bağçasında müvəqqəti yerləşdirilib. Lakin indi heyətin həmin müəssisədən də çıxarılacağı bildirilir. Buna səbəb kimi 46 saylı bağçada müəyyən təmir işlərinin görülməsi göstərilib.
"Uşaqlarımız ortada qalıb. Hara köçürüləcəkləri, hansı bağçaya yerləşdiriləcəkləri barədə bizə konkret məlumat verilmir", – valideynlər bildiriblər.
Qeyd edək ki, 7 saylı körpələr evi-uşaq bağçasında təmir işləri Şəhərsalma və Arxitektura Komitəsi tərəfindən həyata keçirilib. Müəssisənin hansı tarixdə istifadəyə veriləcəyi hələ də məlum deyil.
Valideynlər 7 saylı bağçanın ən qısa zamanda istifadəyə verilməsini və uşaqların bağça probleminin həll olunmasını tələb edirlər.
Məsələ ilə bağlı redaksiyamız tərəfindən Gəncə-Daşkəsən Regional Təhsil İdarəsinə sorğu ünvanlanıb.
