Gəncə şəhər 45 saylı körpələr evi-uşaq bağçasında aparılacaq dezinseksiya işləri ilə bağlı valideynlərə xəbərdarlıq edilib.
Gencexeber.az-a müraciət edən valideynlər bildiriblər ki, bu gün saat 15:30-da uşaqlarını bağçadan götürmələri tələb olunub. Onların sözlərinə görə, işləyən analar üçün iş saatları başa çatmadan övladlarını götürmək məqsədilə iş yerindən icazə almaq problemə çevrilir
Vətəndaşlar qeyd edirlər ki, bağçanın rəhbərliyi bu qərarın səbəbini məktəbəqədər təhsil müəssisəsində bit və birələrin aşkarlanması ilə izah edib. Bildirilib ki, bu səbəbdən bağçada dezinseksiya işləri aparılmalıdır.
Onlar hesab edirlər ki, belə işlərin həftəiçi iş saatlarında deyil, şənbə-bazar günləri və ya qeyri-iş saatlarında həyata keçirilməsi daha məqsədəuyğun olardı. Valdeynlərin fikrincə, bu halda işləyən valideynlər də övladlarını vaxtından əvvəl bağçadan götürmək məcburiyyətində qalmaz və çalışdıqları müəssisələrdə əlavə problemlə üzləşməzlər.
Məsələ ilə bağlı redaksiyamız tərəfindən Gəncə - Daşkəsən Regional Təhsil İdarəsinə sorğu ünvanlanıb.
