Ali Məhkəmədə qəsdən sağlamlığa yüngül zərər vurmada təqsirləndirilən Zərifə Məmmədovanın (adı, soyadı şərtidir) barəsindəki qərardan verilən kassasiya şikayəti üzrə məhkəmə iclası başa çatıb.
Hakim Ələsgər Novruzovun sədrliyi ilə keçirilən prosesdə qərara əsasən, zərərçəkmiş şəxsin kassasiya şikayəti təmin edilməyib.
Belə ki, təqsirləndirilən şəxsin bacısı, zərərçəkmiş Təhminə Məmmədova (adı, soyadı şərtidir) Zərifənin onun barəsində şərəf və ləyaqətini ləkələyən məlumatlar yaydığını iddia edib və məhkəməyə müraciət edib. Zərifə də bunu bəhanə gətirərək Gəncədə küçədə bacısı ilə dalaşıb.
İstintaq materiallarına əsasən, təqsirləndirilən şəxs Təhminəni nalayiq ifadələrlə təhqir edib, yumruqla burnuna vurub. Bundan başqa, hadisə zamanı Təhminənin telefonu yerə düşərək zədələnib və 90 manat məbləğində maddi ziyana düşüb.
Gəncə Şəhər Məhkəməsinin hökmü ilə Zərifə Məmmədovaya 1500 manat məbləğində cərimə cəzası və barəsində seçilmiş başqa yerə getməmək haqqında iltizam qətimkan tədbiri təyin edilib. "Konstitusiya və Suverenlik İli" münasibətilə amnistiya elan edilən zaman cəzadan azad olunub.
