2026-cı ilin yanvar-iyun aylarında Gəncə şəhərində fəaliyyət göstərən sənaye müəssisələri və fiziki şəxslər tərəfindən 372,1 milyon manatlıq sənaye məhsulu istehsal edilib, həmçinin sənaye xarakterli xidmətlər göstərilib.
Gencexeber.az-ın Gəncə Şəhər Statistika İdarəsindən əldə etdiyi məlumata əsasən, ümumi məhsul və xidmətlərin 82 milyon manatı, yəni 22 faizi dövlət sektorunun sənaye müəssisələrinin, 290,1 milyon manatı və ya 78 faizi isə qeyri-dövlət sektorunun sənaye müəssisələri və fərdi sahibkarlıq fəaliyyəti ilə məşğul olan fiziki şəxslərin payına düşüb.
Hesabat dövründə emal sektorunun müəssisələri tərəfindən 334,8 milyon manatlıq məhsul istehsal edilib və sənaye xarakterli xidmətlər göstərilib. Bu məbləğin 287,8 milyon manatı, yəni 86 faizi qeyri-dövlət sektoruna aid olub.
Emal sənayesində istehsal olunan məhsullar arasında metallurgiya sənayesi məhsulları üstünlük təşkil edib. Belə ki, bu sahədə 184,2 milyon manatlıq məhsul istehsal olunub.
Bundan başqa, qida məhsulları istehsalı 62 milyon manat, içki istehsalı 12,5 milyon manat, avtomobil, qoşqu və yarımqoşquların istehsalı 46,9 milyon manat, digər məhsulların istehsalı isə 29,2 milyon manat təşkil edib.
2026-cı ilin ilk 6 ayında Gəncədə elektrik enerjisi, qaz və buxar istehsalı, bölüşdürülməsi və təchizatı sektorunda 28,9 milyon manatlıq məhsul istehsal edilib və xidmətlər göstərilib.
Su təchizatı, tullantıların təmizlənməsi və emalı sektorunda isə məhsul və xidmətlərin ümumi həcmi 6,5 milyon manat olub.
