Gəncənin müxtəlif ərazilərində infrastruktur problemlər qalmaqdadır.
Gencexeber.az-a daxil olan şikayətlərə əsasən, şəhərin müxtəlif qəsəbə və küçələrində işıqlandırma, yol və səkilərlə bağlı ciddi problemlər mövcuddur.
Məsələn, Sevinc qəsəbəsində 11 nömrəli avtobus marşrutunun üzərində olan yolda işıqlandırma sistemi ümumiyyətlə yoxdur.
"Axşam saatlarında göz-gözü görmür. Piyadaların maşınlar tərəfindən vurulması ehtimalı çox böyükdür" – Sakin bildirib.
Əlavə edilib ki, asfalt örtüyü çəkilsə də, səkilər bərpa olunmayıb, hər yerə torpaq tökülüb və piyadalar məcburən avtomobil yolundan istifadə edirlər.
Həmçinin, Sadıllı qəsəbəsində yeləşən 17 nömrəli orta məktəbin qarşısında və ətrafında səkilər bərbad vəziyyətdədir. Burada piyadaların, xüsusi ilə şagirdlərin təhlükəsiz hərəkəti üçün şərait yaradılmayıb. Ərazidə avtomobil sıxlığı da vəziyyəti daha da təhlükəli edir. Bordürlər düzülməsinə baxmayaraq, normal qaydada bərkidilməsi təmin edilməyib. Sakinlər qeyd edir ki, aidiyyəti üzrə dəfələrlə müraciət etsələr də, "baxan yoxdur".
Bundan başqa, şəhərin Təbriz küçəsində kommunal xidmətlər tərəfindən aparılan qazıntı işlərindən sonra 8 aydır yol bərpa olunmayıb. Sürücülər bildirir ki, avtomobillərə ciddi ziyan dəyir.
Natəvan qəsəbəsində, 4 nömrəli marşrut xəttinin son dayanacağına aparan yolun ətrafında yaşayan vətəndaşlar isə şikayət edirlər ki, bütün ətraf küçələr asfaltlansa da, məhz sözügedən yol bərbad vəziyyətdə qalıb: "Toz-torpaqdan evdə oturmaq olmur, həm biz, həm də sürücülər - bezmişik".
Daha bir "maraqlı" hal Şah İsmayıl Xətai prospekti ilə Vaqif küçəsinin kəsişməsində, Gəncə Şəhər Prokurorluğunun inzibati binasının yaxınlığında müşahidə edilir. Orada vətəndaşlardan biri şəxsi torpaqlarından keçid yolu verərək insanların məktəbə, işə və alış-verişə rahat getməsini təmin edib. Lakin hazırda həmin yol zibilliyə çevrilib, milçək və pis qoxu problemi yaranıb.
Sakinlər Gəncə Şəhər İcra Hakimiyyətindən və müvafiq kommunal xidmətlərdən bu problemlərin tezliklə həllini tələb edirlər.
