Xəbər verdiyimiz kimi, Gəncə şəhərinin Həsən Əliyev küçəsində yerləşən ikimərtəbəli binaların sökülməsi narazılığa səbəb olub.
Gencexeber.az məlumat verir ki, sözügedən işlər başlayan gündən sosial şəbəkə istifadəçiləri söküntü işlərinin qanuna zidd olduğunu iddia ediblər. Həmçinin redaksiyamıza daxil olan şikayətlərdə tikililərin tarixi əhəmiyyət daşıdığı bildirilib.
Gəncə Şəhər İcra Hakimiyyətindən sorğumuza cavabda binaların tarixi abidə olması məlumatı təkzib edilib.
"Gəncə şəhəri, Həsən Əliyev küçəsində sökülmüş binalar dövlət qeydiyyatına götürülmüş tarix və mədəniyyət abidələrinin siyahısına daxil edilməmişdir", – açıqlamada bildirilib.
Məlumat üçün bildirək ki, "Gəncə Mall" ticarət mərkəzinin yaxınlığında yerləşmiş bu ikimərtəbəli binaların fasadları 2014-cü ildə, şəhərin keçmiş icra başçısı Elmar Vəliyevin rəhbərliyi dövründə milli ornamentlərə uyğunlaşdırılaraq qırmızı kərpiclə üzlənib.
Oxşar abadlıq və fasad yenilənməsi işləri Şah İsmayıl Xətai prospektində yerləşən 30-a yaxın üçmərtəbəli yaşayış binasında, eləcə də Qəmbər Hüseynli, Pərviz Səmədov və Əziz Əliyev küçələrində də aparılıb.
Qeyd edək ki, söküntü aparılan ərazidə universitet binasının tikiləcəyi ilə bağlı iddialar səslənsə də, məsələ ilə bağlı rəsmi qurumlar və ya hər hansı ali təhsil müəssisəsi tərəfindən ictimaiyyətə açıqlama verilməyib.
