Bu gün Gəncə futbol məktəbinin ən tanınmış yetirmələrindən biri olan Fazil Pərvərovun 57 yaşı tamam olur.
Gencexeber.az məlumat verir ki, Fazil Pərvərov futbolçu karyerası ərzində "Kəpəz"in qazandığı uğurlarda böyük pay sahibi olub. O, "sarı-göylər"in heyətində dəfələrlə Azərbaycan çempionu olub, ölkə kubokunu qazanıb və çempionatın bombardiri adını əldə edib.
"Kəpəz"in heyətində vurduğu 80 qolla klub tarixinin ən məhsuldar futbolçusu olan Fazil Pərvərov, eyni zamanda bir oyunda 7 qol vurmaqla rekord müəyyənləşdirib.
Pərvərov peşəkar karyerasına 1991-ci ildə SSRİ-nin ikinci liqasında çıxış edən Gəncənin "Dinamo" klubunda başlayıb. SSRİ-nin dağılmasından sonra isə adı "Kəpəz" olaraq dəyişdirilən yerli komandada çıxışını davam etdirib.
O, "Kəpəz"lə 1994/95, 1997/98 və 1998/99 mövsümlərində Azərbaycan çempionu olub. Həmçinin 1993/94 və 1997/98 mövsümlərində Azərbaycan Kubokunu qazanıb, 1993/94 və 1995/96 mövsümlərində isə ölkə çempionatının bürünc mükafatçısı olub.
1995/96 mövsümündə 23 qol vuran Fazil Pərvərov Nazim Əliyev və komanda yoldaşı Rövşən Əhmədovla birlikdə çempionatın bombardiri adını bölüşüb.
