"Gəncə Dağçılıq Klubu"nun üzvü, gəncəli alpinist Mahir Hüseyn Ulu Öndər Heydər Əliyevin 103 illiyi münasibətilə ənənəvi olaraq təşkil olunan "Heydər Zirvəsi" yürüşündə iştirak edib.
Gencexeber.az-ın məlumatına görə, səfər "Gəncə Dağçılıq Klubu" və "High Peak" klublarının birgə əməkdaşlığı çərçivəsində təşkil olunub. Ekspedisiya Quba rayonunun Xınalıq kəndindən başlayıb. İştirakçılar tərəfindən 2750 metr yüksəklikdə kamp qurulub.
10 may 2026-cı il tarixində saat 04:30-da kampdan zirvəyə doğru hərəkət edən alpinistlər 3751 metr yüksəklikdə yerləşən Heydər Zirvəsinə uğurla çatıb. Zirvədə Ulu Öndər Heydər Əliyevin əziz xatirəsi bir dəqiqəlik sükutla yad olunub, büstü önündə xatirə şəkilləri çəkilib.
Daha sonra ekspedisiya üzvləri yenidən kampa qayıdaraq yürüşü uğurla başa vurublar. 14 nəfərlik beynəlxalq ekspedisiyanın tərkibində yer alan Mahir Hüseyn bildirib ki, əsas məqsədi dağçılığı təbliğ etmək, Gəncədə yeni alpinistlərin yetişməsinə dəstək olmaqdır. Onun sözlərinə görə, yaxın zamanda müxtəlif ölkələrdən alpinistlərin Gəncəyə dəvət olunması və Kəpəz dağında yürüşlərin təşkili planlaşdırılır.\
